Baby » Feeding » Introducing solids » Kosse om te vermy by babas

Kosse om te vermy by babas

By Terésa Coetzee

Hier's 'n lys van kosse wat moontlik 'n negatiewe reaksie by jou baba kan ontlok, so dis beter om te wag tot hy ouer as 'n jaar is.

Sitrusvrugte: soos lemoene, pomelo’s, suurlemoene, lemmetjies en nartjies moet vermy word as jou kind nog nie ’n jaar oud is nie. Dit kan die derm irriteer en ’n allergiese reaksie veroorsaak.

Tuna: Hoewel tuna ’n ryk bron van omega 3-vette is, beland die kwik in besoedelde seewater dikwels in dié vis en eindig dit in ons liggaam op. Kwik kan die werking van ons brein aantas, depressie veroorsaak, koördinasie beduiwel en ons prikkelbaar laat voel. Hoewel babas van 9 maande af tuna mag eet, moet jy dit liewer nie meer as een keer per week gee nie.

Tamaties: Vermy tamaties ook.

Eiers: Dit is wys om eerder te wag dat jou baba ’n jaar oud is voor jy hom eier begin voer. Goed gaargemaakte eiergeel kan vir jou baba vanaf 6 maande gegee word, hoewel dit wys is om dit ook eerder uit te skakel as julle ’n familiegeskiedenis van eierallergie het. Die meeste kinders ontgroei hul allergie vir eiers teen die ouderdom van 5. Moet nooit eierwit aan luieruitslag aanwend nie! Dis ’n ouvrouraat wat so ’n kwaai reaksie kan veroorsaak dat jou kind in die hospitaal kan beland. Tekens van ’n allergiese reaksie verskyn binne minute, hoewel dit ’n paar uur kan duur voor simptome begin. Simptome sluit in ’n gesig wat swel en netelroos oral op die lyf.

Skulpvis: As jou kind nog nie ’n jaar oud is nie, moet hy liefs nie skulpvis eet nie weens die hoë risiko van allergieë. En as daar ’n familiegeskiedenis is van skulpvisallergieë, moet skulpvis en verwante produkte tot op 3 jaar vermy word. Beperk dit ook as jy borsvoed en ’n familiegeskiedenis van allergieë het.

Heuning: Die rede waarom heuning nooit vir babas onder ’n jaar gegee mag word nie, is dat dit botulisme-spore kan bevat en ’n baba se spysverteringstelsel is eenvoudig nie daarvoor toegerus om dié spore te keer nie. Dit kan in die ingewande begin groei en dodelike gifstowwe vrystel.

Bessies: Vermy bessies, veral aarbeie!

Kunsmatige versoeters: Dit word meestal as veilig beskou deur die Amerikaanse Food and Drug Administration (FDA), maar beperkte inligting is beskikbaar oor die gebruik daarvan by kinders. “Voedsel en drankies met kunsmatige versoeters vervang dikwels voedselsoorte wat noodsaaklike voedingstowwe bevat," sê die boek 'Volgehoue Energie vir Kinders'. Al is dit suikerloos, is dit nie noodwendig beter nie. Party kunsmatige versoeters (soos Maltitol en Xylitol) kan maagkrampe en/of diarree veroorsaak. Fruktose as versoeter by kos pleks van suiker is ook nie noodwendig beter nie. Te veel fruktose het gevolge soos ongemak van die spysverteringskanaal, en volgehoue of gereelde hoë fruktosevlakke in die bloed kan die oë beskadig.

Soja en sojaprodukte: Sommige babas se liggaampies reageer op soja asof dit ’n skadelike stof is en hulle ontwikkel so ’n allergie vir die produk. Die algemene ouderdom waarop dié allergie voorkom, is 3 maande. Baie babas wat allergies is vir soja, is ook allergies vir koeimelk. Die simptome van ’n soja-allergie is diarree, bra-king, prikkelbaarheid, dermatitis (’n jeukerige uitslag), rinitis, asma, koliek-agtige simptome en refluks. Baie ouers vermy soja tot en met 8 maande of selfs vir die eerste jaar. En as jou baba allergies is vir soja, kan hy ook reageer op groenboontjies, graan en rog.

Koring: Volgens Marina Petropulos, skrywer en uitgewer van die 'Baba- en Kindersorg-handboek', moet jy versigtig met koring te werk gaan wanneer graankos aan jou baba bekend gestel word. “Simptome van die maag, vel en neus kan ontstaan in reaksie op die proteïen in koring, hawermeel, rog en gort. Pasop vir produkte wat aangepaste stysel, groentegom, stysel en natuurlike geurmiddels bevat,’’ sê Marina.

Neute: Jou baba kan veilig neute eet.

Kaneel: Vermy asseblief.

Koeimelk: Dit behoort nie voor 12 maande vir babas gegee te word nie – selfs nie eens langlewemelk nie – omdat dit een van die algemeenste oorsake van allergieë is. Dit bevat boonop nie genoeg vitamiene en minerale (veral yster) nie. Beesmelk kan die spysverteringstelsel van ’n jong baba aantas en sy niere beskadig omdat dit so baie minerale bevat. Die proteïene in beesmelk is moeilik verteerbaar en kan hardlywigheid veroorsaak. Kinders ouer as 1 jaar wat nie allergies vir koeimelk is nie, behoort volroommelk te kry tot hulle minstens 5 jaar oud is. (As die kind egter oorgewig is, kan hy van 2 jaar af laevetmelk begin drink.) Kinders het meer vet en kalorieë as volwassenes nodig om hul brein ten volle te laat ontwikkel.

1 of 14

Ons het ’n lysie opgestel van kos waarvoor ’n mens versigtig moet wees omdat dit allergiese reaksies kan uitlok, spysverteringsprobleme kan veroorsaak en selfs gifstowwe kan bevat.

Hoewel nie alle kinders dieselfde op dié kosse reageer nie, is dit wys om versigtiger daarvoor te wees as vir ander. Wanneer jou kind oud genoeg is, kan jy dit bietjie vir bietjie by sy dieet voeg terwyl jy hom fyn dophou.

Het jy geweet?

Borsbabas is 7 keer minder geneig om allergieë te ontwikkel. Hulle is ook net in uitsonderlike gevalle sensitief vir moedersmelk, soos wanneer onverdraagsaamheid vir laktose of galaktosemie voorkom.

’n Allergie vir koeimelk is egter algemeen, selfs al is die formule aangepas, ingedamp of gehumaniseer.

Kosse om in baba se eerste jaar te vermy*

Gis
Sjokolade
Varkvleis
Gluten
Bessies, veral aarbeie
Kaneel
Sesamsaad en -olie
Klapper
Mielies
Tamaties

*Nuwe navorsing toon dat mens wel vroeër kan begin om sekere van bostaande kosse in te sluit en dat 'n weerhouding van kossoorte 'n allergie kan aanmoedig. Raadpleeg asseblief jou dokter!

Ongesonde drinkgoed

Sportdrankies soos Powerade, Lucozade en Energade

Dié drankies is nie geskik vir kinders nie omdat die energiewaarde daarvan baie hoog is en dit eintlik gemaak is vir volwassenes wat sport beoefen. (Selfs dan behoort jy nie meer as 100 ml te drink nie.)
Die drankies het ’n baie hoë suikerinhoud, wat benewens die hoë energiewaarde ook ’n geweldige glukoselading meebring.

Dit plaas die pankreas onder groot druk omdat dit voortdurend groot hoeveelhede insulien moet afskei om al die glukose te hanteer. As die pankreas van jongs af só hard moet werk én jou kind se leefstyl is taamlik onaktief, kan hy tipe-2-diabetes opdoen.

Gaskoeldrank

Gaskoeldranke het meestal baie suiker en omdat tipe 2-diabetes so dramaties by kinders toeneem, moet te veel suiker vermy word.

Vrugtesap

Sommige dieetkundiges meen onverdunde vrugtesap is net so sleg vir jou kind soos ’n gaskoeldrank.
Onthou, vrugtesap bevat baie suur en groot hoe¬veelhede suiker en behalwe dat die suur kinders se tandjies kan beskadig, kan die fruktose en sorbitol in sommige vrugtesappe diarree veroorsaak omdat dit so stadig geabsorbeer word.

Kosse waaraan baba maklik kan verstik

Neute
Groot stukke vrugte of groente, rou en gekook
Groot stukke vleis
Heel druiwe en kersietamaties (sny dit liefs in kwarte)
Springmielies
Sade
Rosyntjies

Email this article Facebook Twitter

Subscribe Facebook Twitter

Disclaimer: The advice on this site is for information purposes only. Please consult your health professional.

Add your comment

Comments - 7 comments

Saskia

Ek is 'n geregistreerde dieetkundige en sal graag wil weet waar die skrywer aan hierdie inligting kom? Van die inligting wat gegee word is uitgedatteer en nie meer toepaslik nie. Daarby is van die inligting wat deurgegee word glad nie wetenskaplik bewys nie.

Posted on Wed, Apr 24th 2013, 21:01

Karin

My Seuntjie is 5 maande oud en is alergies is dit wys om heuning baba pap vir hom the gee dis stage1 ? Is heuning gesond of help dit alergie aan?

Posted on Thu, Nov 15th 2012, 15:50

Marlene

MY kleindogter is 8 maande oud. Mag sy Milo drink wat aangemaak is met water. Sy is 'n bors baba. My kinders was soya melk babas. Ek is net bang sy ontwikkel ook 'n allergie.

Posted on Tue, Jul 10th 2012, 12:26

Reinette

Kan ek hierdie artikel en moontlik bvan jul artikel namens 'your parenting ' aan ons klient stuur en dan verwys na julle website ... in ons nuusbrief ... Moet ek toestemming vra ?

Posted on Sun, Jun 24th 2012, 18:27

Anel van der Merwe

Hoekom het Purity dan vanaf 6 maande mielies en tamaties in hulle babakos? Woolies se babakos bevat ook tamaties.

Posted on Tue, Jan 11th 2011, 13:25

Ane Silva

Ek wil graag weet; my dogtertjie is amper 2 en eet baie sleg! Ek gee haar party aande melk met 1 geklitste eier en teelepel vanilla essence en suiker! Is dit gesond en hoe gereeld kan ek dit vir haar gee!

Posted on Tue, Jan 11th 2011, 10:46

Tasch

Ek weet regtig nie meer wat ek moet en mag en wat nie. In van die boeke word daar uitdruklik gese my kind van 6 mande moet lemoen kry in die oggend(wat ek persoonlik gedink het is nie 'n goeie idee nie) en kersie tamaties vir middag-ete. In een van julle baba tydskrifte word lemoen vir kinders tussen 6 en 12 maande aanbveveel. Sowat moet ek my kind nou eintlik voer want ek weet regtig nie. ASB help

Posted on Tue, Jan 11th 2011, 10:32