Kies die regte karstoeltjie

Daar is drie dinge wat ononderhandelbaar is wanneer jy ’n karstoeltjie koop, sê Elise Lustig van die babaproduk- maatskappy Safeway. Gaan dus winkel toe gewapen met dié inligting:

1. ’n Stempel van goedkeuring

Maak seker die stoeltjie wat julle wil koop voldoen aan die Europese standaard, ECE R44. “Alle nuwe motorstoeltjie wat in Suid-Afrika verkoop word, moet aan die R44/03-standaard voldoen,” sê Elise. “Ouer stoeltjies wat aan vroeër weergawes van die standaard voldoen – soos die R44/02 of R44/01 – is ook nog veilig.” Moet egter nie na die SABS-teken op motorstoeltjies soek nie, want dié buro reik  nie meer sertifikate van goedkeuring vir motorstoeltjies uit nie. Hul rol is bloot om die Europese standaard te implementeer. ’n Ander organisasie, die National Regulator for Compulsory Specifications (NRCS), speel deesdae ’n belangrike rol. Hul werk is om seker te maak dat alle plaaslike vervaardigers (soos Safeway) en invoerders van motorstoeltjies (soos Chelino) aan die ECE-standaard voldoen.

2. Alles gaan oor gewig

Koop ’n stoeltjie wat reg is vir jou kind se gewig. As dit kom by motorstoeltjies is ouderdom nie relevant nie. Maak dus seker jy weet hoeveel jou kind weeg voor julle  winkels toe gaan, veral vir daardie tweede of derde motorstoeltjie. Motorstoeltjies is verdeel in vyf kategorieë, volgens gewig en geraamde ouderdom. Só lyk hierdie groepering: 

Al die motorstoeltjies in Groep 0+ en 0+1 is stoeltjies wat agtertoe wys. Dié in groep 0+ het ’n handvatsel sodat dit maklik gedra kan word en ook buite die motor as ’n sitplek kan dien. Dis meestal geskik van geboorte tot ongeveer 12-15 maande. Stoeltjies in groep 0+1 is vir pasgebore babas tot ongeveer vier jaar bedoel en kan nie in- en uit die motor gehaal word om rondgedra te word nie. Die stoeltjies in Groep 0+1 kan agtertoe  wys tot jou kind sowat 13 kg weeg. Hierna kan dit vorentoe gedraai en gebruik word  tot jou kind 18 kg weeg en tussen drie en vier jaar oud is. Hierdie stoeltjies is net gemaak vir die motor en kan nie in- en uitgehaal word nie. Die stoeltjies in Groep 1 kan min of meer van eenjarige ouderdom af gebruik word. 

Wat sê Baba & Kleuter? 

Stoeltjies wat agtertoe wys is by verre die veiligste vir babas en klein kindertjies, hoofsaaklik omdat hul nekkies dan nie tydens ’n botsing vorentoe sal ruk nie. Ons hou dus baie van ’n stoeltjie waarin jou kind so lank as moontlik agtertoe kan kyk. Groep 1, 2 en 3 is vir kinders wat, soos die tabel aandui, tussen 9 en 36 kg weeg. Dit is van ongeveer ’n jaar oud tot omtrent 11 of 12. Al die stoeltjies in groep 1, 2 en 3 is stoeltjies wat vorentoe wys. Hierdie stoeltjies het ook hul eie gordel wat jy later kan afhaal sodat die stoeltjie ’n versterkte sitplek word wat met die motor se gordel werk. 

Groep 2 en 3 verwys net na versterkte stoeltjies en versterkte kussings en is bedoel vir kinders van 15 tot 36 kg, van omtrent vier tot 12 jaar. Groep 3 is net vir kinders wat tussen 22 en 36 kg weeg en ses tot 11 jaar oud is.  

Wat sê Baba & Kleuter?

Kyk uit vir versterkte sitplekke met “vlerke” aan weerskante van die kopstut, want dit kan jou kind se kop tydens sydelingse impak beskerm. 

3. Installering

Daar is twee maniere om ’n motorstoeltjie te installeer.

• Met jou motor se veiligheidsgordel wat bestaan uit ’n skouergordel, ’n skootgordel en ’n gespe
• Met die Isofix-sluitstelsel wat in motors geïnstalleer is. (Lees hieronder meer oor Isofix.)